Donald Tramp Federal qidiruv byurosining (FQB) Florida shtatidagi Mar-a-Lago qarorgohida o‘tkazilgan tintuvi yuzasidan AQSH hukumati unga 1 milliard dollar miqdorida tovon puli to‘lashi mumkinligini maʼlum qildi. Uning taʼkidlashicha, ushbu mablag‘ undirilgan taqdirda, uni xayriya maqsadlariga yo‘naltirishga tayyor.
Mazkur bayonot Tramp tomonidan 19 dekabr kuni Shimoliy Karolina shtatining Rokki-Maunt shahrida so‘zlagan nutqi chog‘ida bildirilgan.
Davlat rahbari sudga daʼvo arizasi bilan murojaat qilganini va ishda g‘alaba qozonishiga umid qilayotganini aytdi. Shu bilan birga, u vaziyatni “g‘ayrioddiy” deya baholab, agar daʼvo qanoatlantirilsa, ishni hal qiluvchi shaxs sifatida prezidentning o‘zi ishtirok etishi ehtimoli borligini qayd etdi. Tramp bu holatni istehzoli tarzda izohlab, amalda “o‘zi bilan muzokara olib borishi” mumkinligini bildirdi.
Uning so‘zlariga ko‘ra, bunday vaziyat AQSH tarixida ilgari kuzatilmagan. Tramp AQSHni sudga berib, keyin prezident sifatida ushbu sud jarayonini qanday yakunlash masalasini hal qilishi mumkinligini taʼkidladi.
Avvalroq, oktyabr oyining boshida The New York Times gazetasi Tramp o‘ziga nisbatan o‘tgan yillarda olib borilgan federal tergovlar sababli AQSH Adliya vazirligidan qariyb 230 million dollar miqdorida tovon puli talab qilishni rejalashtirayotgani haqida xabar bergan edi.
Nashr maʼlumotiga ko‘ra, Tramp 2023–2024 yillarda ikki marta maʼmuriy shikoyat bilan murojaat qilgan bo‘lib, ularda Mar-a-Lagodagi tintuv hamda Rossiyaning 2016 yilgi AQSH prezidentlik saylovlariga aralashuvi bo‘yicha tergov doirasida uning huquqlari buzilgani taʼkidlangan.
Shu bilan birga, gazeta bunday maʼmuriy shikoyatlar rasmiy sud daʼvosi hisoblanmasligini qayd etadi. Ular dastlab AQSH Adliya vazirligi tomonidan nizoni sudgacha hal qilish imkoniyatlarini aniqlash maqsadida ko‘rib chiqiladi.
Eslatib o‘tamiz, Donald Tramp avvalroq BBS telekompaniyasiga nisbatan uning nutqi buzib talqin qilingani sababli 10 milliard dollarlik daʼvo arizasi bilan murojaat qilgan edi.