Ukraina parlamenti – Oliy Rada – 2025-yil 15–18-aprel kunlari navbatdagi harbiy holat va umumiy safarbarlik muddatini uzaytirish bo‘yicha qaror qabul qilishi kutilmoqda. Bu haqda deputat Yaroslav Jeleznyak o‘zining YouTube kanalida ma’lum qildi.
Eslatib o‘tamiz, harbiy holat Ukrainada 2022-yil fevral oyida joriy etilgan bo‘lib, shundan buyon har 90 kunda uzaytirib kelinmoqda. Oxirgi marta 2025-yil yanvar oyida harbiy holat 8-fevraldan 9-maygacha bo‘lgan muddatga uzaytirilgan edi.
Jeleznyakning ta’kidlashicha, bu safar ham harbiy holat odatdagidek oldindan uzaytiriladi. Agar bu holat avgust oyigacha davom etsa, prezidentlik saylovlarini o‘tkazish imkoniyati bo‘lmaydi. Saylovlarga tayyorgarlik jarayoni esa kamida 90 kun vaqt talab qiladi.
Ma’lumot uchun, amaldagi prezident Vladimir Zelenskiyning vakolati 2024-yil 20-mayda yakunlangan. Ammo urush sharoiti tufayli prezident saylovlari o‘tkazilmagan edi. Ayrim xalqaro siyosatchilar, jumladan AQSh sobiq prezidenti Donald Tramp Zelenskiyni “saylovsiz diktator” deb atab, uning reytingi 4 foizgacha tushganini bildirgan.