Украинадаги можаро июнь охиригача тугаши мумкин — Зеленский
Украина президенти музокаралар янги босқичга чиққани ва уруш яқин ойлар ичида якунланиши эҳтимоли борлигини билдирди.
Украинадаги можаро 2026 йил июнь ойи охирига қадар тугаши мумкин. Бу ҳақда Украина президенти Владимир Зеленский Кипрнинг Европа Иттифоқи Кенгашига раислиги очилиш маросимида маълум қилди, дея хабар бермоқда газета.ru.
Зеленскийнинг айтишича, Европадаги ҳамкорлар, шунингдек, АҚШ ва коалициянинг бошқа аъзолари билан олиб борилаётган музокаралар янги босқичга кўтарилган. Унинг таъкидлашича, уруш Кипрнинг Европа Иттифоқи Кенгашига раислик муддати давомида якунланиши мумкин. Маълумки, Кипрнинг мазкур раислик муддати 30 июнда тугайди.
Шунингдек, Зеленский декабрь ойи охирида Фох Невс телеканалига берган интервьюсида украиналикларнинг 87 фоизи тинчлик тарафдори эканини, бироқ фуқароларнинг 85 фоизи Украина қўшинларининг Донбассдан олиб чиқилишига қарши эканини билдирган. Унинг сўзларига кўра, қўшинларни Донбассдан олиб чиқиш Украина учун “энг ёмон сценарий” бўлиб, мамлакат хавфсизлигига жиддий таҳдид солади ва жамият томонидан номақбул ҳисобланади.
Эслатиб ўтамиз, 6 январ куни Украина президенти Владимир Зеленский, Буюк Британия бош вазири Кейр Стармер ва Франция президенти Эммануэл Макрон Париж шаҳрида можаро якунланганидан сўнг Украинада кўп миллатли кучларни жойлаштириш бўйича декларацияни имзолаган. Бироқ мазкур масалада ҳар бир давлатнинг аниқ мажбуриятлари ҳозирча лойиҳа босқичида қолмоқда.
