МОҚ «Озодлик» радиосига жавоб қайтарди
Миллий Олимпия қўмитаси «Озодлик» радиосида эълон қилинган «Токиога йўл олган ўзбек енгил атлетикачилари президент ваъда қилган мукофот пулини кутмоқда» номли мақоласига изоҳ берди. Бу ҳақда Миллий Олимпия қўмитаси матбуот хизмати хабар берди.
«Озодлик» радиоси мазкур мақолада Миллий Олимпия қўмитаси ва Енгил атлетика федерациясининг спортчиларга президент томонидан ваъда қилинган мукофот пулларини бермаётганига даъво қилган.
Қўмита эса радионинг ушби танқидий мақоласи ҳақиқатга тўғри келмаслигини баён қилиб, бир қатор далилларни келтирди. Унга кўра, Олимпия ўйинларида 7 нафар енгил атлетикачи иштирок этиши, лицензиялар 1 июль куни тасдиқлангани ҳамда улар 5 июль санасида машғулот ўтказиш учун Туркияга жўнаб кетгани таъкидланган. Шунингдек, Миллий Олимпия қўмитаси спортчиларга мукофот пулларини топшириш учун уларни машғулотлардан чалғитмасликни, пандемия шароитида уларни тадбирларга жалб қилмасликни, мукофот пулларини эса Олимпия ўйинлари тугагач, ўз эгаларига топширилиши режалаштирилганини сабаб қилиб келтирган.
Эслатиб ўтамиз, Олимпия ва Паралимпия йўлланмасини қўлга киритган спортчиларга президент томонидан мукофот пули ваъда қилинган. Қарорга мувофиқ, Олимпия ўйинлари йўлланмасини қўлга киритган спортчига 100 миллион сўм, унинг мураббийига эса 50 миллион сўм пул мукофоти берилиши кўрсатилган.
Маълумот ўрнида, Олимпия ва Паралимпия ўйинларида совриндор бўлган спортчиларга Президент қарорига асосан, пул мукофотлари тўлаб берилади. Хусусан, Олимпиадада олтин медални қўлга киритган спортчи учун 200 минг, кумуш медаль учун 100 минг ва бронза медалини қўлга киритганлиги учун 50 минг AҚШ доллари миқдорида пул мукофоти тўлаб берилиши кўзда тутилган.
Жамшидбек Амиров
