Акбар Жўраев Токио—2020 Олимпиадаси олтин медалини қўлга киритди
Токио—2020 Олимпиадасида -109 кг вазн тоифаси вакиллари ўртасида мусобақалар 3 август куни бўлиб ўтди.
Ўзбекистонлик спортчи Акбар Жўраев даст кўтаришда 193 кг вазнни бўйсундирди ва Олимпия ўйинлари рекордини такрорлади. Бироқ орадан кўп ўтмай Арманистон вакили Симон Мартиросян 195 кг тошни кўтариб, рекордни янгилади. Шу тариқа даст кўтаришда Жўраев иккинчи ўринни олди.
Силтаб кўтаришда 237 килограммни кўтарган Акбар умумий 430 кг вазнни бўйсундирди. Бу билан Жўраев биринчи натижани қайд этиб, олтин медалга сазовор бўлди.
Шу тариқа Ўзбекистон делегациясининг медаллари сони учтага етди. Аввалроқ таэквондочи Улуғбек Рашидов олтин медалга эга чиққан, дзюдочи Давлат Бобонов эса бронзани қўлга киритганди.
