Коронавирусга чалинган абитуриентларнинг имтиҳонга кириши очиқланди
2021/2022 ўқув йили қабулида олий таълим муассасаларига кириш тест синовлари юртимиздаги эпидемиологик вазиятдан келиб чиқиб, очиқ майдонларда ўтказилади.
Бу ҳақда Давлат тест маркази хабар берди.
Тест синовлари 5 август санасидан бошланади. Имтиҳонларни ўтказиш учун ҳудудларда стадион ва хиёбонлар танлаб олинган бўлиб, тест синови ўтказилишидан олдин ва тугаганидан кейин ҳудуд тўлиқ дизинфекция қилинади. Абитуриентлар ҳудудга киришда икки метрлик ижтимоий масофага амал қилишлари шарт. Ҳудудга киришда барча абитуриентларнинг тана ҳарорати ўлчаниб, антисептик воситалар билан қўллар тозаланади. Ҳудудга киришда тана ҳарорати 37 даражадан юқори бўлган ҳамда тест синовлари ўтказиладиган даврда коронавирус инфекциясига чалинган ва даволаниш муолажаларини олган абитуриентларга республика бўйича тест синовлари тўлиқ якунлангандан сўнг қўшимча имтиҳон ташкил этилади.
Абитуриентлар тест синовига шахсий паспорти ёки ИД картаси ҳамда абитуриент рухсатномаси билан келиши шарт. Паспорт нусхаси ва бошқа ҳужжатлар билан келган абитуриентлар тест синовларига киритилмайди. Абитуриентлар тест синови ўтказиладиган ҳудудга телефон, калькулятор, қулоқчин, соат, луғат, «шпаргалка» каби воситаларни олиб келиши таъқиқланади. Агар абитуриентда бу каби нарсалар аниқланса, у имтиҳондан четлаштирилади. Тест синовлари очиқ майдонларда ўтказилишидан келиб чиққан ҳолда, абитуриентлар имтиҳонга кепка, панама каби бош кийимларда келиши мумкин. Видеофиксациядан ўтганда шахси тасдиқланмаган абитуриент бармоқ изи сканери орқали текширилади. Унда ҳам шахси тасдиқланмаган абитуриент Ички ишлар ходимлар томонидан ўтказиладиган суриштирув натижасига кўра далолатнома асосида тест синовидан четлаштирилади. Абитуриентлар текширувлардан ўтказилгач, уларга тиббий ниқоб берилади. Тиббий ниқоб янгисига алмаштирилиши шарт. Тест синови ўтказиладиган майдонларда ҳар бир абитуриент учун 3 метр квадратдан кам бўлмаган жой ажратилади ва тест синовлари куннинг салқин пайтида икки сменада ўтказилади. Бунда биринчи смена 7:00 да, иккинчи смена 19:00 да бошланади. Биринчи сменада қатнашадиган абитуриентлар 6:30 гача, иккинчи сменада эса 18:30 гача ҳудудга кириб, ўз жойига жойлашган бўлиши керак. Белгиланган вақтдан кечикиб келган абитуриентлар тест синовларига киритилмайди. Абитуриентларга учта мажбурий, иккита мутахассислик фани бўйича жами 70 та тест топшириғини ечиш учун жавоблар варақасини тўлдириш билан бирга уч соат вақт ажратилади. Блютусстационар ва 360 градусга айланувчи видеокузатув мосламалари билан таъминланади ҳамда тест жараёни test2021.uz сайти орқали онлайн транслация қилиб борилади.
Белгиланган тартиб-қоидаларга тўлиқ амал қилинг! Унутманг, барчаси ўз қўлингизда!
Эслатиб ўтамиз, аввалроқ абитуриентларга имтиҳонга киришдан олдин эътибор бериши керак бўлган эслатмалар ҳамда тест саволларининг “Х варианти” чиққани ҳақида хабар берилганди.
Баҳринисо МАДУМАРОВА
