Токио-2020. 12- кунда спортчиларимизнинг қайд этаётган натижалари

Вакилимиз дастлабки даврада хитойлик полвонни мағлуб этди.

Мингху Лиуга қарши кечган қизиқарли курашда Абдуллаев ғалабани ўз фойдасига ҳал қилди ва чорак финалга йўл олди. Ҳамюртимиз ярим финал йўлланмаси учун АҚШ ва Россия Олимпия қўмитаси вакили ўртасидаги баҳс ғолибига қарши курашади.

Бугун яна бир эркин курашчимиз Жабраил Шапиев ҳам Олимпиядада илк беллашувини ўтказди. Баҳсда спортчимиз эронлик Ҳассан Язданичаратига қарши курашди ва мағлубиятга учради. Энди эронлик спортчи финалга чиқса, Шапиев бронза медали учун курашиши мумкин. Бугун каноэчиларимиз ҳам эрта тонгдан баҳсларга киришди. Нилуфар Зокирова нимчорак финал беллашувида 200 метр масофага ўтказилган мусобақада 49.686 сония натижа қайд этиб ўз гуруҳида 6-ўринни эгаллади. Ҳозиргина ниҳоясига етган чорак финал баҳсида эса Зокирова яна 6-ўринни қўлга киритди ва турнирдаги ўз иштирокини якунлади. Яна бир каноэчимиз Дилноза Раҳматова дастлабки чиқишида 200 метрга кечган саралаш босқичида 47.716 сония натижа билан 5-ўринни эгаллаб чорак финалга чиққанди. Бу босқичда эса Раҳматова 3-ўринни эгаллади. Спортчиларимиздан енгил атлетикачимиз Екатирина Воронина 100 метрга тўсиқлар оша югуриш баҳсларида 14.19 натижа қайд этди ва ўз шахсий рекордини янгилади. Ўнкурашда қатнашаётган 24 нафар спортчи ичида бу 23-натижа ҳисобланади, 24-ўринни эса маррага етиб кела олмаган кубалик спортчи банд этди. Бироздан сўнг Екатирина баландликка сакраш баҳсларида иштирок этади.

Эслатиб ўтамиз, бугун яна бокс беллашувларида Баҳодир Жалолов ҳам ярим финал баҳсларида ўз чиқишини бошлайди.