Давлат Бобонов Президент совға қилган уйни бориб кўрди
Аввал хабар қилганимиздек, “Токио-2020” ёзги Олимпиада ўйинлари ғолиб ва совриндорларига Президент совғаси — машина ва уй калити топширилган эди.
Бугун дзюдо бўйича “Токио-2020” совриндори Давлат Бобонов оиласи билан давлатимиз раҳбари совға қилган «Траилблазер» автомобилида иккинчи мукофот – янги уйни бориб кўрди. Бу ҳақда Милллий олимпия қўмитаси хабар қилди.
Айтиш жоиз, Бобоновлар оиласи ушбу совғалардан жуда ҳам хурсанд ва кайфиятлари аъло. Улар ўз таассуротлари билан ўртоқлашар экан, кўрсатилаётган эътибор ва ғамхўрлик учун Президентимиздан бениҳоят миннатдор эканликларини билдиришди.
«Олимпиада ўйинларида ҳамма спортчи ўз юрти, номи ва оиласи шарафини ҳимоя қилади. Менинг она Ватаним— Ўзбекистон учун кўрсатган мана шундай кичик хизматим жуда ҳам юқори баҳоланганидан бахтиёрман. Келгуси Олимпиада ўйинларида бу менга жуда катта мотивация беради», – деди Олимпиада совриндори Давлат Бобонов.
Эслатиб ўтамиз, “Токио-2020” Олимпиадасининг бронза медали соҳибларига пойтахтимизда қад ростлаётган «Гринпарк» мажмуасидан 2 хонали уй совға қилинди.
