Курашчимиз жаҳон чемпионати финалида қатнашади
Шу кунларда Россиянинг Уфа шаҳри эркин ва юнон-рум кураши бўйича жаҳон чемпионатига мезбонлик қилмоқда.
Унда ўзбекистонлик курашчилар ҳам муносиб иштирок этмоқда. Терма жамоамиз сафида 55 килограмгача вазн тоифасида иштирок этаётган Алимардон Абдуллаев финал йўлланмасини қўлга киритди.
Ўзбекистонлик курашчи 1/8 финалда қирғизистонлик Акйикат Кулжигитни, чорак финалда руминиялик Денис Флоринни мағлуб этди. Ярим финалда тожикистонлик Аслам Азизовга қарши гиламга чиққан курашчи якунда 8-3 ҳисобида ғалаба қозонди. Абдуллаев жаҳон чемпионати олтин медали учун эронлик Амирризо Деҳбозорги билан курашади.
Бундан аввал курашчиларимиз жаҳон чемпионатида иштирок этаётгани ҳақида хабар берган эдик.
Жамшид Амиров
