Халқаро мусобақадан қайтган самбочиларимиз татанали кутиб олинди
Россия Федерасиясининг Санкт-Петербург шаҳрида самбо бўйича FIAS (Халқаро самбо федерацияси) президенти соврини учун мусобақа ўтказилди.
Мусобақада жаҳоннинг 21 мамлакатидан 80 нафарга яқин спортчи кураш олиб борди. Мукофот жамғармаси 189 минг АҚШ долларини ташкил этувчи баҳсларда ўзбекистонлик самбочилар 4 та кумуш медални қўлга киритди.
Мусобақада қатнашган терма жамоамиз вакиллари бугун эрталаб юртимизга қайтиб келди. Бу ҳақда Ўзбекистон самбо федерацияси матбуот хизмати хабар берди.
Спортчиларимиз Ислом Каримов номидаги Тошкент халқаро аэропортида тантанали равишда кутиб олинди. Унда Ўзбекистон туризм ва спорт вазирлиги, Ўзбекистон Ички ишлар вазирлиги, Миллий гвардияси ва Ўзбекистон самбо федерацияси вакиллари қатнашди.
Эслатиб ўтамиз, мусобақада Ҳомиджон Мўминов (-64 кг), Сарбон Эрназаров (-71 кг), Улуғбек Раҳмонов (-79 кг) ва Ихтиёр Эшмуродов (-88 кг) кумуш медалга сазовор бўлди.
Бундан аввал самбочиларимиз мусобақада тўртта кумуш медални қўлга киритгани ҳақида хабар берган эдик.
