Навбатдаги олтин медал! Феруз Саидов финалда қозоғистонлик рақибини мағлуб этди
Токио шаҳрида Паралимпия ўйинлари давом этмоқда. 28 август куни пара дзюдо бўйича мусобақалар ўтказилмоқда.
-81 кг вазн тоифасида ўзбекистонлик Феруз Саидов мусобақанинг ҳал қилувчи баҳсида қозоғистонлик Темиржан Даулетни иппон баҳоси билан мағлуб этиб, Паралимпия ўйинларининг олтин медални қўлга киритди.
Шу тариқа Ўзбекистон делегациясининг мусобақадаги олтин медаллари сони 4 тага етди. Умумий медаллар борасидаги кўрсаткич эса 9 тани ташкил қилмоқда.
Эслатиб ўтамиз, бундан аввалроқ “Токио-2020”: Паралимпиячиларимиз дастлабки медални қўлга киритгани, ёллар ўртасида пара енгил атлетиканинг найза улоқтириш турида Ф13 классида ҳамюртимиз Нозимахон Қаюмова олтин медални қўлга киритгани ҳамда енгил атлетиканинг диск улоқтириш бўйича F57 классида ўтказилган баҳсларда ҳамюртимиз Моҳигул Ҳамдамова ҳам олтин медалга сазовор бўлгани тўғрисида хабар бергандик.
