АҚШ Буюк Британия ва Австралия билан ҳарбий ҳамкорликни кенгайтиришга келишиб олди
АҚШ Буюк Британя ва Австралия билан ҳарбий ҳамкорликни кенгайтиришга келишиб олди, дея хабар бермоқда «Риа Новости».
Эндиликда янги AUUKUS альянси тузилади. Жозеф Байденнинг фикрича, бу ҳамкорликдан асосий мақсад кучайиб бораётган таҳдидларга қарши энг замонавий қуроллар билан жавоб беришдан иборат бўлади. Ҳозирда AUUKUS 3 мамлакат флоти, олимлари ва саноатини бирлаштириши таъкидланди. Шунингдек, киберхавфсизлик, сунъий интеллект ва турли квант технологиялари соҳасида ҳамкорлик қилинади.
Альянс ўзининг дастлабки лойиҳасини ҳам эълон қилди. Унга кўра, Австралия флоти атом сувости кемалари билан кучайтирилади. Лекин у ядро бомбаси эмас, оддий қуроллар билан жиҳозланади. Австралия бош вазири Скот Моррисон Канберра АҚШ ва Буюк Британия билан ҳамкорликда сувости кемаларини ишлаб чиқармоқчи эканини маълум қилди.
Британия бош вазири Борис Жонсон ушбу иттифоқ катта аҳамиятга эга эканини қайд этган. "Бу ҳамкорлик бизнинг Ҳинд ва Тинч океани ҳавзасидаги энг муҳим манфаатларимизни ҳимоя қилишда керак бўлади", — деган Жонсон.
Мутахассисларнинг фикрича, AUUKUS, энг аввало, Хитойнинг ўсиб бораётган таъсирига қаратилган. АҚШ XX асрдаги энг ашаддий рақиби собиқ Иттифоққа қарши НАТОни тузгани каби, бу ҳам Хитойга қарши қаратилган ҳарбий альянс вазифасини бажаради. Пекиннинг Вашингтондаги элчихонаси бунга муносабат билдириб, АҚШни совуқ уруш давридаги фикрлашдан воз кечишга чақирди.
Эслатиб ўтамиз, бундан аввал АҚШ генерали Хитой ва Россия билан урушга кирмаслик зарурлигини айтган эди.
Жаҳонгир Қўзиев
