Қорақалпоғистонда шамол электр станцияси қурилади
Қорақалпоғистоннинг Қораўзак туманида қуввати 100 МВт бўлган шамол электр станцияси барпо этилади . У давлат-шериклик тамойили асосида қурилади.
Энергетика вазирлиги Ахборот хизматининг хабар беришича, бугун, 16 сентябрь куни Қорақалпоғистонда 100 МВт қувватга эга шамол электр станциясини қуриш бўйича халқаро тендер натижалари эълон қилинди.
Унга кўра, Саудия Aрабистонининг “ACWA Поwер” компанияси 1 киловатт-соат учун 2.5695 AҚШ цент тариф таклифи билан тендер ғолиби деб топилди.
Шунингдек, “Масдар” компанияси 1 киловатт-соат электр энергияси учун 2.6550 цент таклиф берган ва захирадаги ғолиб деб топилган.
Мазкур станция 2023 йилда ишга туширилади ва йилига 350 миллион киловатт-соат электр энергияси ишлаб чиқаради. Ушбу лойиҳа амалга оширилиши ортидан Республикада экологик тоза энергия ишлаб чиқарилиши ҳажми ортади. Шунингдек, шамол электр станцияси йилига иссиқхона газлар чиқишини 160 минг тоннага камайтиради.
Эслатиб ўтамиз, аввалроқ “Masdar” компанияси Самарқанд ва Жиззахда 2 та фотоэлектр станцияси қуриши хабар қилинган эди.
Жаҳонгир Қўзиев
