Месси фаолиятини «Барса»да тугатмоқчи эди — Леонардо
«ПСЖ» жамоаси спорт директори Леонардо Мессининг клубга ўтишига оид баъзи тафсилотларни ошкор қилди.
«Лео билан гаплашганимизни яширмайман. Бу воқеа унинг «Барселона» билан шартномаси тугашига 6 ой қолганида, яъни январь ойида бўлиб ўтди. Биз унгача Месси билан боғланмаганмиз. Менимча, Лео «Барса»да қолишни хоҳларди. У менга клубини ўзгартирмоқчи эмаслигини, Каталонияда ўз фаолиятини якунламоқчи эканини айтди.
Аммо ҳамма нарса ҳам биз истагандек бўлавермайди. Мессининг «Барселона»даги ҳикояси тугади ва Парижга янки ҳикоя яратиш учун келди. Бу тирик афсонани «ПСЖ» либосида кўриш ақл бовар қилмас иш эди. Бу жуда ёқимли туйғу. Бизда дунёнинг энг яхши ўйинчиси бор», — дейди Леонардо.
Маълумот учун: «Барса»нинг собиқ ўйинчиси Лионел Месси 10 августда парижликлар билан шартнома имзолаган.
Эслатиб ўтамиз, бундан аввал Майкл Оуэннинг «ПСЖ»даги уч ҳужумчи ҳақидаги фикрларини тақдим этган эдик.
Мақсаджон Обиджонов
