"Сурхон" клуби аъзолари Жавоҳир Эсонқуловни урди...(ми? )

Яқинда ижтимоий тармоқларга "Сурхон" клуби собиқ футболчиси Жавоҳир Эсонқулов ўзининг калтаклангани юзасидан тегишли органларга мурожаат қилгани тўғрисидаги видеони жойлаштирди.

Ушбу видеода футболчини “Сурхон” клуби аъзолари калтаклагани айтилган. Воқеага клуб матбуот хизмати муносабат билдирди.

Маълум бўлишича, "Сурхон" клуби ва собиқ футболчи Жавоҳир Эсонқулов ўртасида тузилган шартнома 2021 йилнинг 21июль куни иккала томоннинг ўзаро келишувига кўра бекор қилинган ва футболчи клубдан ҳеч қандай молиявий эътирози йўқлиги ҳақидаги расмий ҳужжатга қўл қўйиб, тасдиқлаб берган. Собиқ футболчи шартнома бекор қилинган бўлса-да, клуб офисига келиб, қўшимча пуллар талаб қила бошлаган. Собиқ футболчилар Жавоҳир Эсонқулов ва Акром Ходжаев ўзаро тил бириктириб, клуб офиси эшиги ёнида жамоа раҳбари номига қўпол сўзлар айтган. Бу вазиятдан хабар топган жамоа сардори Асрор Ғафуров вазиятга ойдинлик киритиш мақсадида ҳар иккала футболчини клуб офисига олиб келган ва ушбу сўзларни нега ёзганлиги бўйича изоҳ сўраган. Футболчилар эса буни улар ёзмаганлигини айтади. Бироқ уларнинг ҳар бир ҳаракати клуб офисида ўрнатилган кузатув камераларида ёзиб олинган. Жамоа сардори Асрор Ғафуров футболчиларни тартибга чақирган вақтида ўлар ўртасида зиддият пайдо бўлган ва иккала футболчи бир-бири билан муштлашиб кетган. Клуб спорт директори А.Таиров ва клуб 1-вице президенти А.Абдураҳмонов ҳар иккала футболчини ажратиб, яраштириб қўйган. Шундан сўнг собиқ футболчилар Ж.Эсонқулов ва А.Ходжаев ўз айбига иқрор бўлиб, ёзма равишда узр сўраган.