“Толибон”нинг тан олиниши энг муҳим масала эмас – Покистон ТИВ
Покистон “Толибон” ҳокмиятини тан олишга шошилмайди. Бу ҳақда Покистон ТИВ раҳбари Шоҳ Маҳмуд Қурайший маълум қилди.
“Покистон толибларни тан олгани йўқ. Биз вазият қай тарзда ривожланишини кузатамиз. Улар вақтинчалик ҳукумат тузилганини эълон қилди, лекин ҳозир бу босқичда “Толибон”ни ҳеч ким тан олмайди”, — деган Қурайший.
Покистон ташқи ишлар вазири толибларнинг ҳозирда тан олиниши энг муҳим масала эмаслигини айтган. Унинг фикрича, ҳозирда энг муҳим масала –– гуманитар инқирознинг олдини олиш.
“Агар ҳеч қандай ҳаракат қилинмаса, гуманитр ҳалокат юз беради. Покистон унинг оқибатлари билан дарҳол тўқнаш келади, аммо охир-оқибатда Ғарб ҳам бунга товон тўлайди”, – деб огоҳлантирган Қурайший.
Маълумот ўрнида: 15 август куни “Толибон” ҳаракати Кобулни эгаллаган. 31 августда АҚШ Афғонистонни тўлиқ тарк этди. Ҳаракат томонидан эгалланмаган ягона вилоят Панжшер эди. Аммо 6 сентябрда ушбу ҳудуд ҳам “Толибон” назоратига ўтди. Шундан кейин толиблар 7 сентябрь куни мамлакатнинг янги ҳукумати тузилганини эълон қилди.
Бундан аввал Эрон Президенти Иброҳим Раисий Эрон ва Тожикистоннинг Афғонистон бўйича позицияси яқин эканини айтган эди.
Жаҳонгир Қўзиев
