Бугун Тошкентда “тунги велосайр” ўтказилади

 

 

Сана муносабати билан Тошкентда “Тунги велосайр” ташкил этилади. Сайр бугун, 22 сентябрь куни кеч соат 20:00да бошланади. Маҳтумқули ва Мирзо Улуғбек кўчаларидан “Янги Ўзбекистон” боғигача бўлган йўлда давом этади. Велоҳаракат давоомида автомобиллар ҳаракати тўлиқ тўхтатилмайди. Тадбирда профессионаллар қатори кўнгиллилар ҳам иштирок этишлари мумкин.

 

Туризм ва спорт вазири сана муносабати билан давлат идоралари ва маҳаллий органлар раҳбарларини шахсий намуна кўрсатишга чорлади.

 

 

-“Халқаро автомобилсиз кун” муносабати билан давлат идоралари ва маҳаллий органлари раҳбарларини шахсий намуна кўрсатиб, 22 сентябрь “Халқаро автомобилсиз кун” тадбирларида фаол иштирок этишга чақираман. Шу билан бирга, илм-фан, маданият ва спорт соҳалари ходимлари ҳамда ОАВ вакилларини, қолаверса барча юртдошларимизни шу куни оммавий тадбирларда фаол иштирок этишга ҳамда бир кун давомида автомобил ўрнига велосипеддан фойдаланиш ёки пиёда ҳаракатланишга чорлаб қоламан. Автомобилсиз кун акцияси доирасида #carfreeday_uzbekistan, #shaxsiynamunakursat, #avtomobilsizbirkun хештегларидан фойдаланиб, яна-да кенг аҳолини қамраб олишни таклиф этаман. Зеро бу каби тадбирларни ўтказиш мамлакатимизда йўл харакати хафсизлигини яна-да такомиллаштириш, шаҳар аҳолиси ўртасида экологик маданият ҳамда соғлом турмуш тарзини тарғиб қилишни мақсад қилган. Жаҳон соғлиқни сақлаш ташкилоти ҳам ўз тавсияларида жисмоний фаолликни ошириш инфецион, юрак-қон томир, саратон ва қандли диабет касалликлар профилактикасида муҳим ўрин тутишини таъкидлайди. Шундай экан, фикримча, айни дамда дунёда пандемия билан боғлиқ вазиятда бундай акциянинг ўтказилиши айни муддаодир”, - дейди Бош вазир ўринбосари – туризм ва спорт вазири Азиз Абдуҳакимов.

 

Ташкилотчиларнинг маълум қилишича, фестиваль доирасида Тошкент шаҳрининг тунги гўзаллиги, маданий хусусиятлари кенг тарғиб қилиниб, аҳолининг турли қатламлари иштирокида велосайр, скейтларда, самокатларда ва роликларда учиш, шунингдек, моҳир велосипедчилар томонидан аҳолига веломаҳорат дарсларини намойиш этиш ўрин олган.

 

Эслатиб ўтамиз, аввалроқ Қорақалпоғистонлик юртдошимиз Берунийдан Тошкентгача бўлган масофани велосипедда босиб ўтгани ҳақида хабар берилганди.