Арманистон Туркия билан муносабатларни тиклашга тайёр — Армен Григорян
Арманистон Туркия билан муносабатларни босқичма-босқич нормаллаштиришга, шунингдек, икки мамлакат вакилларининг учрашувларини юқори даражада ташкил қилишга тайёр. Бу ҳақда Хавфсизлик Кенгаши котиби Армен Григорян маълум қилди.
“Биз бутун минтақада тинчлик ўрнатиш зарурлиги ҳақида гаплашдик. Шу нуқтаи назардан Туркия билан муносабатларни тартибга солишимиз керак. Жараён босқичма-босқич бўлиши лозим. Учрашув ва музокаралар муаммоларни ҳал қилиш усулларидан биридир”, — деди Григорян.
Арманистон Хавфсизлик Кенгаши котиби Туркия билан муносабатларни тартибга солиш тан олинмаган Тоғли Қорабоғ Республикаси мақоми билан боғлиқ эмас, деди. Бундан аввал Арманистон бош вазири Никол Пашинян унинг жамоаси Туркия билан муносабатларни нормаллаштиришга, чегараларни очиш ва алоқаларни яхшилашга тайёр эканлигини бир неча бор билдирганди. Пашинян фикрича, бу қадам минтақага тинчлик ва барқарорлик олиб келади.
Умумий чегара бирлиги ва қўшничиликка қарамай, Арманистон ва Туркия ўртасида дипломатик муносабатлар ўрнатилмаган. 2009 йилда Тсюрихда икки давлат ташқи ишлар вазирлари дипломатик муносабатлар ўрнатиш ва муносабатлар тамойиллари тўғрисидаги протоколларни имзолади, бироқ бу ҳужжатлар томонлар томонидан ратификация қилинмади. 2018 йил 1 мартда Арманистон протоколлар бекор қилинганини эълон қилди.
Арманистон расмийлари бир неча бор Туркия Озарбайжонга 2020 йилнинг кузида Тоғли Қорабоғ атрофидаги можаролар пайтида ҳарбий жиҳатдан ёрдам кўрсатганини билдирган. Ереван, шунингдек, Анқара минтақага Яқин Шарқдан жангарилар юбораётганини даъво қилди.
Насиба Тўхтаева
