Тошкентдаги деҳқон бозорида истеъмолга яроқсиз тузлама маҳсулотлари аниқланди
Уй шароитида тайёрланган консерва маҳсулотлари аксарият ҳолларда санитар нормаларига жавоб бермайди. Маълумки, консервани нотўғри тайёрлаш, сақлаш баъзи пайтларда эса ўлим билан якунланишига олиб келади. Соғлиқни сақлаш вазирлиги юртимиз аҳолисини ботулизмдан ҳимояланиш учун уй шароитида тайёрланган консервалардан фойдаланмасликка ва саноатда ишлаб чиқарилган консервалардан фойдаланишни бот-бот такрорлайди.
Учтепа тумани фавқулодда вазиятлар бўлими, туман санитария-эпидемиологик осойишталик ва жамоат саломатлиги хизмати ва "Фарҳод" деҳқон бозори маъмурияти билан ҳамкорликда Ботулизм ва озиқ-овқат маҳсулотларидан оммавий заҳарланишнинг олдини олиш мақсадида профилактик тадбир ўтказилди.
Маълум қилинишича, 4 октябрь куни ўтказилган тадбир давомида "Фарҳод" деҳқон бозорида хонадонда тайёрланган консерваланган тузлама маҳсулотларидан 12 килограмми истеъмолга яроқсиз эканлиги аниқланиб, улардан 10 килограмм бодринг тузламаси ва 2 килограмм консерваланган қалампир тузламаси йўқ қилинди.
Қайд этилишича, ботулизм ва озиқ-овқат маҳсулотларидан заҳарланишлар билан боғлиқ касалликларнинг олдини олиш бўйича "Фарҳод" деҳқон бозоридаги сотувчилар билан тарғибот тадбири ҳам ташкил этилди.
Маълумот учун, Жаҳон соғлиқни сақлаш ташкилотининг маълумотларига кўра, ботулизм оғир, ҳатто ўлимга ҳам олиб келиши мумкин бўлган, аммо кам кузатилувчи касаллик ҳисобланади. Бу овқатдан заҳарланиш бўлиб, одатда зарарланган таомдаги юқори фаолликдаги нейротоксинлар оқибатида юзага келади. Ботулизм одамдан одамга юқмайди.
Эслатиб ўтамиз, Оққўрғондаги боғча тарбияланувчилари заҳарлангани юзасидан жиноий иш қўзғатилганди.
Аввалроқ Тошкент вилоятининг Оққўрғон туманидаги 5-сонли давлат мактабгача таълим ташкилотининг 25 нафар бола заҳарлангани, Самарқандда яшовчи фуқаро хонадонида бўлиб ўтган тўйда қатнашчиларнинг 74 нафари оммавий заҳарлангани ҳамда Оққўрғондаги боғча тарбияланувчилари заҳарлангани юзасидан жиноий иш қўзғатилгани ҳақида хабар берилганди.
