Жаҳон иқтисодиёти ва дипломатия университетида тўлов-контракт миқдорига доир ҳужжат лойиҳаси ишлаб чиқилади
Жаҳон иқтисодиёти ва дипломатия университетида бакалавр ва магистр даражалари учун таълим олаётган ҳамда шартнома асосида ўқишга кирган талабаларга тўлов-контракт миқдорини аниқ белгиловчи норматив-ҳуқуқий ҳужжат лойиҳаси ишлаб чиқилади.
Бу ҳақда Президентнинг “Норматив-ҳуқуқий ҳужжатлар ва уларнинг лойиҳаларини коррупцияга қарши экспертизадан ўтказишни янада такомиллаштириш чора-тадбирлари тўғрисида”ги қарори лойиҳаси билан тасдиқланадиган “Йўл харитаси”да белгиланди.
Унга кўра, Олий ва ўрта махсус таълим ҳамда Ташқи ишлар вазирликлари 2021 йил 1 ноябрга қадар Олий таълим муассасаларида талабаларга тўланадиган стипендиялар миқдорларини белгилаш, тайинлаш ва тўлашда қонунийлик, очиқлик ва шаффофликни таъминлаш мақсадида тегишли норматив-ҳуқуқий ҳужжат лойиҳасини ишлаб чиқади.
Мазкур лойиҳада Ташқи ишлар вазирлиги томонидан Жаҳон иқтисодиёти ва дипломатия университетида тўлов-контракт асосидаги бакалавриатда таълим олишнинг қиймати базавий ҳисоблаш миқдорининг 80 бараваридан, магистратурада таълим олишнинг қиймати базавий ҳисоблаш миқдорининг 90 бараваридан ошмайдиган миқдорда белгиланиши қайд этиб қўйилади.
Аввалроқ 2021 2022 ўқув йили учун тўлов контракт миқдори эълон қилингани ҳамда талабалар контракт пулини QR кодли тўлов шартномалари орқали тўлаши ҳақида хабар берилганди.
Чўлпоной Аҳмедова
