Жиноий жавобгарликка тортиш ёши ўзгартирилиши мумкин
Жиноий жавобгарликка тортиш ёши ўн уч ёшдан ўн тўрт ёшга кўтарилмоқда. Бу ҳақда депутат Расул Кушербаев ижтимоий тармоқдаги ўз саҳифасида хабар берди.
Давлат раҳбарининг 2021 йил 9 августдаги “Бола ҳуқуқларининг кафолатларини таъминлаш тизимини янада такомиллаштириш тўғрисида”ги фармонида жиноий жавобгарликка тортишнинг энг кам ёшини ўн тўрт ёш қилиб белгилаш таклиф этилган эди.
Депутатнинг айтишича, ҳозирда Жиноят кодексига ўзгартиш киритишга доир қонун лойиҳасини Қонунчилик палатасида кўриб чиқиш кутилмоқда.
Бу тажриба дунё амалиётида ҳам мавжуд. Жумладан, Германия, Италия, Испания, Япония ва МДҲ мамлакатлари жиноят қонунчилигида жиноий жавобгарликка тортишнинг энг кичик ёши ўн тўрт этиб белгиланган.
Мазкур ўзгартишлар инсонпарварлик йўлидаги яна бир қадамдир – деб таъкидлайди Расул Кушербаев.
Бундан аввал фуқаролик бурчини бажараётган шахсга қаршилик учун жиноий жавобгарлик кучайтирилгани ҳамда ҳуқуқбузарлик содир этган шахс етказилган зарарни қоплаб, жабрланувчи билан ярашса, жавобгарликдан озод этилиши мумкинлиги ҳақида хабар берилганди.
Оламгир Абдиев
