“UzAuto Motors” бош директори илк бор туғилган кунини Ўзбекистонда нишонлади
Бо Инге Андерссон 1955 йил 16 октябрда Швециянинг Фалькенберг шаҳрида туғилган. У жорий йилнинг август ойида “UzAuto Motors” АЖ ва "UzAuto Motors Powertrain" АЖ бош директори этиб тайинланган эди. Куни кеча Андерссон ўз туғилган кунини илк бор мамлакатимизда нишонлаган.
Маълумот учун, “UzAuto Motors” бош директори Швеция Ҳарбий Академиясининг ҳамда Гарвард университетининг олий менежмент программаси битирувчиси ҳисобланади. Шунингдек, Стокгольм университетининг бизнес бошқаруви бакалаври ҳам. Бо Андерссон ўз фаолиятини 1987 йилдан Швециянинг “Saab Automobile AB” компаниясида бошлаган.
У “Адам Смит” халқаро автомобиль форумида “2010 йилнинг энг яхши етакчиси” деб топилган. 2012 йилда Бо Андерссон Европанинг автомобилсозлик соҳасидаги етакчи нашриёти “Automotive Supply Chain” томонидан “GAZ Group”ни инқироздан кейинги молиявий ҳолатини тиклагани ва Россиянинг енгил тижорий воситалар бозорида компаниянинг етакчилигини таъминлагани учун “Энг яхши ютуқлар” мукофотига сазовор бўлган.
Аввалроқ Бо Андерссон “UzAuto Motors” бош директори бўлгани ҳамда монополист компания истеъмолчилар ҳуқуқларини бузишда давом этаётгани ва бу масаласига Кушербаев эътибор қаратгани ҳақида хабар берилганди.
Оламгир Абдиев
