Ўзбекистоннинг собиқ муфтийси “Дунёнинг энг нуфузли 500 мусулмони” рўйхатига киритилди
Марҳум собиқ муфтий Усмонхон Алимов Иордания пойтахти Ўмондаги қироллик стратегик тадқиқотлар ислом маркази томонидан эълон қилинган “Дунёнинг энг нуфузли 500 мусулмони” рўйхатидан ўрин олди.
Бу рўйхат 2009 йилдан буён амал қилади, унга мусулмон дунёсига сиёсий, мафкуравий, маданий ва бошқа йўналишлар бўйича таъсир кўрсата олган машҳур инсонлар киритилади.
Қайд этилишича, рўйхат тузилганда унда топ-50 мусулмоннинг исми келтирилган. Шунингдек, 13 та тоифа бўйича диний йўналишда 450 нафар мусулмон номи санаб ўтилган.
Ушбу тоифалар орасида илмий, сиёсий, дин ишлари бошқармаси ҳамда воизлар бўлган. Қолаверса, хайрияга ҳисса қўшувчилар, ижтимоий муаммолар, бизнес, фан ва технология, санъат ва маданият, ва машҳурларнинг номлари киритилган.
Маълумот учун: рўйхатнинг илк беш поғонасида Қатар амири Шайх Тамим ибн Ҳамад ал-Тани, Саудия Арабистони подшоҳи Салмон ибн Абдулазиз, Эроннинг олий раҳбари Сайид Али Хоманайи, Туркия президенти Ражаб Тоййиб Эрдоған ва Иордания подшоҳи Абдуллоҳ II номи қайд этилган.
Шу билан бирга, таниқли спортчилардан UFC амалдаги чемпион Ҳабиб Нурмагомедов ва “Ливерпуль” ҳужумчиси Муҳаммад Салоҳ ҳам ушбу рўйхатдан ўрин олган.
Бундан аввал Ўзбекистон бош муфтийси Москвада даволанаётгани ва унинг вафоти муносабати билан Чечинистон раҳбари ҳамдардлик билдиргани ҳақида хабар берилганди.
Чўлпоной Аҳмедова
