Дамашқда теракт: ҳарбийлар колоннаси “мина”га учради
Дамашқ марказида теракт содир этилди. Бу ҳақда “РИА Новости” хабар берди.
Маълум қилинишича, шаҳарнинг Раис кўприги яқинида қўйилган иккита “мина” портлаган. Бундан асосий нишон Сурия армияси аскарлари минган автобус бўлган. Портлаш оқибатида 14 ҳарбий ҳалок бўлди. Шунингдек, уч киши оғир яралангани хабар қилинмоқда. Ҳозирча тинч аҳоли вакиллари жабрлангани ҳақида маълумот йўқ.
Баъзи манбаларда таъкидланишича, учинчи бомба портламай қолган. Уни армия саперлари зарарсизлантиришга муваффақ бўлган. Маҳаллий эксперт Ҳусам Шуайб теракт эрта тонгда содир этилганини айтган. Бу вақтда кўча гавжум бўлган.
Бундан аввал Сурия ТИВ Туркиядан мамлакатни тарк этишини талаб қилгани, Қандаҳорда шиа масжиди портлатилгани хабар қилинганди.
Жаҳонгир Қўзиев
