Хюистра, Ҳасанов, Секейра, Йўлдошева ва Бердиев иши чора кўриш учун қўмиталарга оширилди
Ўзбекистон чемпионатидаги ўйинларда юз берган баҳсли ҳолатлар бўйича муносабат билдирилди.
Cоcа-Cола Суперлига 23-туридан ўрин олган “Сўғдиёна” – “Пахтакор” учрашувидан кейин меҳмонлар бош мураббийи Питер Хюистра ўз фикрини билдирди, мезбонлар футболчиси Жасур Ҳасанов эса унга жавоб қайтарди.
Жасур Ҳасанов ўз жавобида Питер Хюистрага нисбатан қўпол сўзларни ишлатган. Ўзбекистон Профессионал футбол лигаси унинг бу ҳақоратларини қоралаб, Ҳасанов масаласини O'FА Этика қўмитасига оширди.
Ҳасановнинг бундай хатти-ҳаракатига “Пахтакор” бош мураббийи билдирган фикр сабаб бўлган. Ўзбекистон Профессионал футбол лигаси мураббийлар фикрини ҳурмат қилган ҳолда чегарадан чиқмасликни сўраган. Шундан келиб чиқиб, меҳмонлар бош мураббийи иши ҳам Этика қўмитасига оширилди.
Бундан ташқари, Cоcа-Cола Суперлиганинг мазкур туридан ўрин олган “Қўқон-1912” – “Локомотив” ўйинидан кейин меҳмонлар бош мураббийи Микаэл Секейра ҳам ўз фикрини билдирган. Ўзбекистон Профессионал футбол лигаси португалиялик мураббий фикрларини ҳурмат қилади ва ҳар қандай ҳолатда ҳам уни Регламентга амал қилишга чақиради. Шунингдек, учрашув ҳакамларини танқид қилишга чеклов қўйилмаган. Агар ҳакамлар хатога йўл қўйса, ёзма равишда шикоят киритилиши кераклиги ва бу борадаги йўл-йўриқлар Регламентда ўз ифодасини топгани маълум қилинган. Регламентнинг 18.19-бандидан келиб чиқиб, Секейра иши интизом чораси қўллаш учун Тартиб-интизом қўмитасига оширилди.
Cоcа-Cола Суперлига 23-туридан ўрин олган “Андижон” – “Насаф” учрашуви давомида меҳмонлар бош мураббийи Рўзиқул Бердиев Регламентга зид бўлган қатор хатти-ҳаракатларни амалга оширган. Хабарларга кўра, “Насаф” устозининг хатти-ҳаракатларига ҳам Тартиб-интизом қўмитаси баҳо беради.
Аёллар Олий лигасининг 20-туридан ўрин олган “Пахтакор-W” — “Навбаҳор-W” учрашувига ҳакам томонидан қўшиб берилган дақиқаларда меҳмонлар учрашувни якунламай, майдонни тарк этган. Шундан келиб чиқиб, O'zPFL жамоа бош мураббийи Карима Йўлдошеванинг лицензиясини вақтинча бекор қилди ва унинг хатти-ҳаракатларини Тартиб-интизом қўмитасига оширди.
Аввалроқ “Насаф” ОФК Кубоги финалига йўл олгани ва Элдор Шомуродовнинг нархи кескин кўтарилгани ҳақида хабар берилганди.
Жамшидбек Амиров
