Ўзбекистон Америка давлатлари ташкилоти ҳузуридаги доимий кузатувчи мақомини олди
Ўзбекистон ғарбий ярим шардаги энг узоқ тарихга эга халқаро ташкилотнинг 73-доимий кузатувчиси бўлди.
Америка давлатлари ташкилоти (АДТ) доимий кенгаши Ўзбекистонга доимий кузатувчи мақомини берди. Бу ҳақда "Дунё" ахборот агентлиги хабар берди.
Қайд этилишича, АДТ Шимолий ва Жанубий Американинг 35 давлатидан ташкил топган. Ўзбекистон ғарбий ярим шардаги энг узоқ тарихга эга халқаро ташкилотнинг 73-доимий кузатувчиси бўлди.
Ўзбекистоннинг АҚШдаги элчиси Жавлон Ваҳобов АДТ доимий кенгаши раиси Жошуа Фиажо билан учрашув ўтказди. Унда томонлар минтақавий ва глобал хавфсизлик устувор йўналишларида ҳамкорликни кенгайтириш, инсон ҳуқуқлари ва демократик эркинликларни таъминлаш, шунингдек, минтақавий иқтисодий интеграцияни рағбатлантиришдан манфаатдор эканини таъкидлади.
Қўмитанинг ихтисослаштирилган муассасалари ва аффилланган тузилмалари билан қишлоқ хўжалиги, соғлиқни сақлаш, телекоммуникация, фан-таълим, маданият ва туризм соҳаларидаги ҳамкорлик истиқболлари алоҳида муҳокама қилинди.
Жошуа Фиажо, шунингдек, Ўзбекистоннинг Лотин Америкаси ва Кариб денгизи мамлакатлари билан, биринчи навбатда, савдо ва сармоя соҳасида ўзаро манфаатли муносабатлар ўрнатиш учун ташкилот платформасидан фойдаланиш истагини қўллаб-қувватлади.
Маълумот учун: Америка давлатлари ташкилоти 1948 йил Пан-Америка иттифоқи (1889 йилда тузилган) негизида ташкил этилган. АДТ ташкилотга аъзо давлатлар ўртасидаги ҳамкорликни мустаҳкамлаш, уларнинг суверенитети ва ҳудудий яхлитлигини ҳимоя қилиш мақсадларига хизмат қилади.
Эслатиб ўтамиз, аввалроқ Ўзбекистон парламенти хотин-қизлар сони бўйича дунёдаги 190 та миллий парламент ўртасида 37-ўринга кўтарилгани, Ўзбекистон-Филиппин муносабатларининг ҳозирги ҳолати ва ривожланиш истиқболлари муҳокама қилингани ҳамда Жаҳон мусулмонлари саёҳати индекси рейтингида Ўзбекистон 16-ўринни эгаллагани ҳақида хабар берилганди.
