Зироат Мирзиёева раислигидаги "Замин" фонди 2 минг нафар болага ёрдам берди
Фонд эшитиш қобилияти заиф болалар таълимини қўллаб-қувватлаш дастури доирасида мактаб-интернатларга замонавий ФМ тизимларини совға қилди.
"Замин" фонди Васийлик кенгаши раиси Зироат Мирзиёева Жиззах вилоятига ташрифи давомида Зарбдор туманидаги 1 ва 2-сонли мактаб-интернатда бўлди. Бу ерда таълим олаётган 2 минг нафар ўқувчига 2 донадан замонавий эшитиш аппарати бепул топширилди.
Зироат Мирзиёева ўқувчилар билан учрашувда шундай деди:
“Олдимизда турган муҳим вазифалардан бири, сиз ўзингизни намоён қилишингиз учун зарур шароитларни яратиб бериш. Ўқишда, ишда, ижодда, спортда, ижтимоий фаолиятда ўзингизни топа олишингизни истаймиз. Қобилиятингиз, қизиқишларингизни юзага чиқаришда ҳеч қандай тўсиқ бўлмасин, деймиз. Муҳим вазифаларимиздан бири – инклюзив жамиятни яратиш. Сиз ўз маҳоратингизни ошириб, сифатли таълим олишингиз ва тўсиқларсиз жамиятга янада мослашишингизни истаймиз".
Маълумот учун: Қорақалпоғистон Республикаси, Жиззах, Қашқадарё, Бухоро, Фарғона ва Андижон вилоятларида жойлашган 8 та ихтисослаштирилган мактабларда ҳам ана шундай жиҳозлар ўрнатилиши режалаштирилган. 2022 йил охиригача Республика бўйлаб 18 та мактаб-интернат тўлиқ жиҳозланишига эришилади.
⠀
ФМ-тизим керакли товушларни бевосита ўқувчининг эшитиш аппаратларига узатаётгани туфайли болалар ўқитувчининг гапини эшитади ва нутқни синфда ҳам, шахсий дарсларда ҳам ривожлантиради. Бундан ташқари, бир гуруҳ мутахассислар болаларнинг эшитиш қобилиятини диагностика қилиш ва эшитиш воситаларини индивидуал созлаш бўйича амалий ишлар олиб бормоқда.
Эслатиб ўтамиз, аввалроқ имконияти чекланганларнинг йўллардаги чекланган имкониятларига чек қўйиш зарурлиги ҳақида хабар берилганди.
Чўлпоной Аҳмедова тайёрлади.
