“Аталанта” Миранчукнинг ўрнига футболчи топди
Голландиянинг “ПСВ” клуби ҳужумчиси Чуквунонсо Мадуэкенинг Италия А сериясига ўтиши деярли ҳал бўлган. 19 ёшли англиялик футболчига “Аталанта” катта қизиқиш билдирмоқда.
Хабарларга кўра, Мадуэкени “Аталанта”га ўтказиш бўйича музокаралар самарали давом этмоқда.
“Бергамо” клуби Мадуэкени ҳужумкор ярим ҳимоячи Алексей Миранчукка ўриндош сифатида кўрмоқда. Россиялик футболчи яқин орада ижарага кетиши керак, “ПСВ”нинг ҳужумкор футболчиси эса жамоада ўз ўрнини эгаллааши шубҳасиз.
Эслатиб ўтамиз, Алексей Миранчук ўтган йилнинг сентябрь ойида “Аталанта” билан шартнома имзолаган эди. Россиялик футболчининг “Бергам” клуби билан шартномаси 2024 йилнинг 30 июнига қадар тузилган. У ўтган мавсумда 39 та ўйинда майдонга тушиб, 7 та гол урди ва 3 та голли узатмани амалга оширди. Трансфермаркет портали футболчининг нархини 13 миллион еврога баҳоламоқда.
Аввалроқ Конте “Қизил иблис”ларни бошқармоқчи эканлиги ҳақида хабар берилганди.
Жамшидбек Амиров
