Шевченконинг генуяликлар сафида қачон иш бошлаши маълум

 

“Женоа”нинг янги бош мураббийи Андрей Шевченко эртага, 9 ноябрь куни жамоа билан илк машғулотни ўтказади.

 

Хабарларга кўра, украиналик мутахассис Генуяга бугун етиб келиши керак. Унинг ёрдамчиси Мауро Тассотти аллақачон “Женоа” базасига бориб, клуб инфратузилмаси билан яқиндан танишган. Шунингдек, эртага “Луиджи Феррарис” стадионида Шевченкони жамоанинг янги бош мураббийи сифатида таништириш маросими бўлиб ўтади.

 

Шевченко фаолияти давомида фақат Украина терма жамоасида бош мураббий сифатида ишлаган. У терма жамоа билан биргаликда шу йилги Европа чемпионатида чорак финалга қадар етиб бориб, Англия терма жамоасига 0:4 ҳисобида имкониятни бой берганди. Шундан сўнг украиналик мураббий 2021 йилнинг 1 август куни лавозимидан озод этилганди.

 

Эслатиб ўтамиз, Шевченко футболчилик  фаолиятида “Милан” клуби шарафини ҳимоя қилган.  Ҳужумчи у ерда рақиб дарвозасига 322 та ўйин ўтказиб, 175 та тўп киритган ва 45 та голга ҳаммуаллифлик қилган.

 

Аввалроқ Кейлор Навас жароҳати туфайли иккита ўйинни ўтказиб юбориши ва “Фиорентина” футболчисига бир нечта топ клублар қизиқиш билдираётгани ҳақида хабар берилганди.

 

Жамшидбек Амиров