Россиядан Ўзбекистонга 5 та махсус йўловчи поездлар қатнови йўлга қўйилади
Чипталарни электрон тарзда ҳам сотиш мумкин.
Транспорт вазирлиги ахборот хизмати хабарига кўра, “Ўзбекистон темир йўллари” акциядорлик жамияти томонидан “Волжский-Тошкент” йўналишида 483-сонли йўловчи поездининг 5 та махсус рейси йўлга қўйилади.
Қайд этилишича, ушбу поездларга фақат бир томонга, яъни “Волжский-Тошкент” йўналишига чипталар сотилади. Мазкур поездлар 15, 19, 22, 26, 29 ноябрь кунлари соат 20:57 да “Волжский-Тошкент” йўналишида ҳаракатини амалга оширади.
Маълумот учун: Россиядаги юртдошларимизнинг яқинлари Ўзбекистонда туриб, уларнинг шахсини тасдиқловчи ҳужжати нусхаси билан “Ўзбекистон темир йўллари” акциядорлик жамияти веб-сайти орқали е-ticket.railway.uz дан чипталарни электрон тарзда харид қилиб олиб, жўнатишлари ҳам мумкин.
Эслатиб ўтамиз, аввалроқ Уҳан шаҳридан Тошкентга биринчи юк поезди йўлга чиқгани, “Волжский - Тошкент” ҳамда “Толятти - Тошкент” йўналишларида йўловчи поездларининг махсус рейслари йўлга қўйилгани ҳамда Москвадан Ўзбекистон шаҳарларига доимий авиақатновлар сони ошиши ҳақида хабар берилганди.
