Автомобилларга газ тўлдириш компрессор шохобчалари фаолиятига вақтинча ўзгартиришлар киритилди
Ушбу чеклов чоралари вақтинчалик хусусиятга эга ва агар тегишли шароитлар юзага келса, ёқилғи қуйиш шохобчалари нормал ишлашга қайтади.
Фавқулодда вазиятлар вазирлиги маълумотига кўра, республикамиз ҳудудида 2021 йил 16-18 ноябрь кунлари нам ва совуқ ҳаво кузатилиб, кечаси -5 -8С, шимолий ҳудудларда -12 -15С гача совуқ бўлиб, шамол тезлиги секундига17-28 метргача кучаяди.
Вазирлар Маҳкамасининг 2018 йил 12 январдаги 22-сон қарорининг “Табиий газдан фойдаланиш қоидалари”, 7–боб 58-банди ҳамда улгуржи ва Автомобилларга газ тўлдириш компрессор станцияларига табиий газ етказиб бериш тўғрисида расмийлаштирилган икки томонлама шартнома шартларидан келиб чиқиб, вилоят ҳокимликлари томонидан тасдиқланган жадвалга асосан Автомобилларга газ тўлдириш компрессор шохобчаларида чекловлар жорий қилинади.
Бундан мақсад – биринчи навбатда табиий газ етказиб берилиши муҳим ҳисобланган аҳоли, шифохона, мактаб ҳамда мактабгача таълим ташкилоти каби аҳамиятга эга муассасалар, шунингдек, электр энергияси ишлаб чиқарувчи йирик станцияларнинг табиий газ таъминотида барқарорлигини таъминлашдан иборат.
Аввалроқ, 2022 йилда электр энергияси ва табиий газ нархи ошиши кутилмоқдалиги ҳамда газ тармоқларига ўзбошимчалик билан уланганлик учун жарима қўлланилиши ҳақида хабар берилганди.
Муножат Валиева
