Геном бўйича давлат рўйхатига олиш тартиби белгиланди

 

Маълумот учун: Геном организмни қуриш ва сақлаш учун зарур бўлган биологик маълумотларни ўз ичига олади. Кўпгина геномлар, шу жумладан инсон геноми ва бошқа барча ҳужайрали ҳаёт шаклларининг геномлари ДНК таҳлилига эга.

 

Геном бўйича давлат рўйхатига олиш – биологик материалдан фойдаланиш, одамнинг шахсини, таниб олинмаган мурдани аниқлаш учун геномга оид ахборотга ишлов бериш билан боғлиқ фаолият.

 

Геном бўйича мажбурий рўйхатга олинадиган тафсилотлар мавжуд. Булар:

 

▪️ оғир ва ўта оғир жиноят, жинсий эркинликка қарши жиноят, 16 ёшга тўлмаганлар билан жинсий алоқа қилиш ва уларга уятсиз ҳаракатлар қилиш билан боғлиқ жиноят содир қилганлар;

 

▪️ оғир ва ўта оғир жиноят содир этишда гумон қилинувчи ёки айбланувчи тариқасида жалб қилинганлар;

 

▪️ терговга қадар текширув, суриштирув ва дастлабки тергов жараёнида биологик материал олингани аниқланмаган шахслар;

 

▪️ таниб олинмаган мурдалар.

 

Жазони ижро этиш муассасалари ва пробация хизмати бу бўйича мажбурий рўйхатга олинадиган шахслар рўйхатини шакллантиради. Бундан ташқари, геном бўйича ихтиёрий равишда давлат рўйхатига олиш фуқароларнинг ёзма аризасига кўра пуллик асосда амалга оширилади.

 

Эслатиб ўтамиз, аввалроқ голограмма билан мулоқот қилиш имконини берувчи қурилма яратилгани ҳамда ҳуқуқбузарлик содир этган шахс етказилган зарарни қоплаб, жабрланувчи билан ярашса, жавобгарликдан озод этилиши мумкинлиги ҳақида хабар берилганди.

 

Чўлпоной Аҳмедова