Навоийда 2,3 кг олтинни муомалага киритмоқчи бўлган шахс ушланди
Ҳозирда тергов ҳаракатлари ўтказилмоқда.
Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум бўлишича, Департамент, ДХХ ва ИИБнинг Навоий вилояти бошқармалари томонидан тезкор тадбир ўтказилди. Унда фуқаро С.Н. соф қуйма олтинни ўтказиш мақсадида фуқаро Р.дан 548 грамм соф қўйма олтинни 328,5 миллион сўмга, фуқаро Б.дан эса 1,7 кг соф қуйма олтинни 1,7 миллиард сўмга харид қилган.
Таъкидланишича, тадбир якунида ундан жами 2,3 кг соф қуйма олтин парчалари ашёвий далил сифатида олиб қўйилган. У Навоий — Самарқанд йўналишида “Nexia-2” русумли автотранспорт воситасида ҳаракатланиб келаётган вақтида қўлга олинди.
Мазкур ҳолат юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, аввалроқ тилла буюмларнинг олиб чиқиб кетилишининг олди олингани, шарбат тайёрлаш қурилмаси ичига яширинган тилла ва заргарлик буюмлари фош қилингани ҳамда Наманганда 35 миллион сўмлик тилла тақинчоқларни ўғирлаган аёллар аниқлангани ҳақида хабар берилганди.
