Андижонда блогер аёл калтакланди
ИИБ томонидан терговга қадар текширув ҳаракатлари олиб борилмоқда.
Ижтимоий тармоқларда туман электр тармоқларидан фермерларга сунъий равишда ёзилган қарз бўйича ҳужжат сўраган блогер Фатима Жўраева бош ҳисобчи томонидан калтаклангани айтилган хабар тарқалди.
Бу ҳақда блогернинг ўзи ҳам видеомурожаат билан чиқди.
Ўзбекистон Республикаси Бош прокурорининг матбуот котиби Ҳаёт Шамсутдинов ҳолатга муносабат билдирди. Аниқланишича, блогер Фатима Жўраева Улуғнор тумани ИИБга 22 ноябрь куни мурожаат қилган.
Ўз мурожаатида туман электр тармоқлари корхонаси бош ҳисобчисидан ўзи ҳуқуқшунос сифатида ишлаб келаётган фермер хўжалигига электр энергиясидан қарздорликни сунъий равишда оширилганлиги бўйича тегишли ҳужжатларни беришини талаб қилганлигини билдирган. Шунда корхона бош ҳисобчиси унга қўпол муносабатда бўлгани, унга қўл кўтариб уяли қўл телефонини синдириб ташалганини билдирган. Қилмиши учун корхона ходимларига нисбатан қонуний чора кўришликни сўраган.
Ҳаёт Шамсутдиновнинг сўзларига кўра текширув ҳаракатлари Бош прокуратура томонидан назоратга олинган.
Ҳозирда мазкур мурожаат бўйича туман ИИБ томонидан терговга қадар текширув ҳаракатлари олиб борилмоқда. Ф.Жўраеванинг олган тан жароҳатларини оғирлик даражасини аниқлаш мақсадида суд-тиббий экспертизаси тайинланган.
Аввалроқ Қашқадарёда банк ходимлари мижозлар томонидан калтаклангани ҳамда Мисрда блогер қиз қамалгани ҳақида хабар берилганди.
Муножат Валиева
