8 йил олдин йўқолган қизнинг мурдаси топилди
Марҳумани ўгай отаси бўғиб ўлдиргани аниқланган.
Суриштирувларга кўра, қизнинг жасади Тошкент вилоятининг Паркент туманида жойлашган дала ҳовлилардан бирининг ертўласидан топилган.
Ҳали 18 га тўлмаган Наргиза 2012 йил 21 сентябрда Эски Жува бозорида ўгай отаси Санжарбек чақиргани боис унинг олдига борган ва қайтиб келмаган. Асли сурхондарёлик бўлган 1984 йилда туғилган Тўхтаев Санжарбек марҳуманинг онасидан 9 ёш кичик бўлган.
Қизнинг уйга қайтиб бормагани яқинларини хавотирга солган. Кейин Ички ишлар органлари ва Прокуратурага ариза билан мурожаат қилган. Бироқ улар ҳам қизнинг на ўлигини, на тиригини топишади.
Орадан шунча вақт ўтган бўлсада ҳамон тегишли жойларга мурожаат қилиб юрган қизнинг яқинлари орадан 8 йил ўтибгина асл ҳақиқатни билишди.
Воқеа тафсилотига кўра, марҳуманинг ўгай отаси Санжарбек Шайхонтоҳур туманида жойлашган Эски Жува бозори ҳудудида Ғиёсова Наргиза (ўгай қизи) билан телефон орқали боғланади ва уни алдов йўли билан ушбу бозор ҳудудига чақириб олади. Кейин улар Наргизанинг онаси Умарова Нигорага тегишли бўлган Паркент туманидаги далаҳовлига боришади. Манзилга келишгач ўгай ота қизни чойшаб билан бўғиб ўлдиради ва далаҳовлининг ертўласига кўмиб, воқеа жойидан яширинади.
Айбланувчининг кўрсатмасига биноан, Паркент туманидаги далаҳовли, яъни ҳодиса жойи ўрганилганда, ҳақиқатдан ҳам мазкур уйнинг ертўласида инсон суяклари топилди.
Мазкур ҳолат бўйича 36 ёшли Санжарбек Жиноят Кодексининг 92-моддаси 2-қисми (қасддан одам ўлдириш жиноятини содир этиш) билан айбдор деб топилди ва Тошкент вилояти суди томонидан 20 йилдан ортиқ муддатга озодликдан маҳрум этилди.
Аввалроқ Қашқадарёда 60 ёшли эркак шаръий никоҳдаги тўртинчи хотинини пичоқлаб ўлдиргани ҳақида хабар берилганди.
Оламгир Абдиев
