Ўзбекистонлик собиқ теннисчи Албина Хабибулина умрбод спортдан четлаштирилди

 

2 декабрь куни Tennis Integrity Agency (ITIA) агентлиги собиқ теннисчи Албина Хабибулина умрбод дисквалификация қилингани ҳақида хабар берди.

 

Бунга Теннисда коррупцияга қарши кураш дастурининг (TACP) кўплаб қоидалари бузилгани сабаб бўлгани айтилмоқда.

 

Бундан аввал, Франция полицияси келишилган ўйинларда қатнашганликда гумон қилинган икки теннисчини қўлга олгани, улардан бири Ўзбекистонлик Албина Хабибулина эканлигини маълум қилган эди.

 

Теннисчи олдиндан келишилган ўйинларни ташкил қилиш айби билан 2021 йил 21 ноябрь санасидан бошлаб умрбод спортдан четлатилган.

 

Албина ўзига қўйилган айбловларга эътироз билдирмаган. Спортчининг арбитраж судига апелляция бериши учун яна 20 кун бор.

 

Айни дамда Албина Хабибулина 2017 йилдан бери Ўзбекистон фуқароси ҳисобланмайди. Бу ҳақда Ташқи ишлар вазирлиги баёнот берган.

 

Эслатиб ўтамиз, Албина Хабибулина фаолияти давомида IFT яккалик баҳсларида энг кўп 492 очкога, IFT жуфтлик баҳсларида эса энг кўп 208 очко тўплаган.

 

Аввалроқ, Буюк Британия паралимпия терма жамоаси аъзоси Эрин Макбрайнинг қонида “остарин” тақиқланган модда аниқлангани учун уч йилга дисквалификация қилингани, ўзбекистонлик 7 нафар спортчи ҳамда Ўзбекистонда хизмат кўрсатган спортчида допинг аниқлангани ҳақида хабар берилганди.

 

Муножат Валиева