Макрон ва Путин ўртасида телефон суҳбати бўлиб ўтди

 

Франция томонининг ташаббуси билан Россия президенти Владимир Путин француз ҳамкасби Эммануэл Макрон билан телефон орқали мулоқот қилди, дея хабар бермоқда Кремль матбуот хизмати. 

 

"Украина атрофидаги вазият ва Россия Федерацияси хавфсизлигининг узоқ муддатли ҳуқуқий кафолатларини ишлаб чиқиш бўйича Россия ташаббуси билан боғлиқ масалалар бўйича мазмунли мулоқот давом этди. Давлат раҳбарлари ишларнинг ҳозирги ҳолатига, жумладан, яқинда бўлган алоқаларни ҳисобга олган ҳолда ўзаро баҳо беришди.”, — дейилади баёнотда.

 

Кремль матбуот хизмати хабарига кўра, Путин Макроннинг эътиборини "Киев раҳбариятининг Минск келишувларига зид келадиган провокацион баёнотлари ва ҳаракатларига" қаратган. Бундан ташқари, томонлар шахсий алоқалар ҳақида келишиб олдилар, дея қўшимча қилди Кремль.

 

Путин ва Макрон ўртасидаги бу телефон суҳбати охирги ҳафтадаги учинчиси бўлди. Бунгача Россия ва Франция президентлари 28 ва 31 январь кунлари бир-бирларига қўнғироқ қилишган.

 

Ғарб давлатлари Россия қўшинларининг Украина чегараси яқинида ҳаракатланишидан хавотирда. Уларнинг фикрича, Россия бу давлатга бостириб киришни режалаштираётган бўлиши мумкин. Россия, ўз навбатида, ҳеч қандай босқинни режалаштирмаганлигини бир неча бор таъкидлаган.

 

Аввалроқ АҚШ зарур бўлса америкалик ҳарбийларни Украинага юбориши хабар қилинганди.

 

Насиба Тўхтаева