Саудия Арабистони ва БАА етакчилари Байден билан гаплашишни истамади
Шу билан бирга улар ўтган ҳафта давомида икки марта Путин билан телефонда мулоқот қилган.
Яқин Шарқнинг икки давлати еткачилари Байден билан мулоқот қилишдан бош тортди. Бу ҳақда The Wall Street Journal газетаси хабар берди.
Гап БАА ва Саудия Арабистони ҳақида кетмоқда. АҚШ Президенти Саудия валиаҳд шаҳзодаси Муҳаммад бин Салмон билан углеводородлар бозоридаги вазият юзасидан музокара ўтказмоқчи бўлган. Унда нефть қазиб чиқариш муҳокама қилиниши режалаштирилган.
Худди шундай вазият БАА Қуролли кучлари олий бош қўмондони ўринбосари, Абу-Даби валиаҳд шаҳзодаси шайх Муҳаммад бин Зайд ал Нахаён билан ҳам такрорланган.
The Wall Street Journal улар Байден билан гаплашишдан бош тортганига қарамай, ўтган ҳафтада Путин билан телефон музокаралари ўтказганига эътибор қаратган.
Маълумот ўрнида: Россиянинг Украинага қарши махсус операцияси бошлангач, АҚШ Россия нефть ва газига тақиқ қўйди. Шунингдек, Европанинг ҳам Москва углеводородларидан воз кечишга чақириқлар янграмоқда. Оқибатда нефть нархи 2008 йилги рекордни такрорлади. Газ эса тарихий рекорд қайд этиб, 7 март куни минг кубометр табиий газнинг нархи 4000 долларни ташкил этди.
Эслатиб ўтамиз, аввалроқ ЕИ Россия газидан ҳозир воз кеча олмаслиги тўғрисида хабар берилганди.
