Президент мактабига ўқишга кира олмаганларга янги имтиёз берилди
Бу ҳақда Президент таълим муассалари агентлиги ахборот хизмати хабар берди.
Президент мактабига ўқишга кира олмаган ўқувчилар янги ташкил этилаётган ихтисослаштирилган мактабларга имтиҳонсиз қабул қилиниши мумкин. Бу ҳақда АОКАда ўтказилган брифингда Президент таълим муассалари агентлиги ахборот хизмати раҳбари Дилфуза Собирова маълум қилди.
Бунга ҳуқуқий асос сифатида Вазирлар Маҳкамасининг 15 апрелда тасдиқланган 8-сон баёни келтирилган. Унга кўра, Президент мактабига 5-синф кириш имтиҳонлари иккинчи босқичида иштирок этиб, ўқишга кира олмаган талабгорлар ҳар бир вилоятда ташкил этилган аниқ фанларга ихтисослаштирилган мактабга ўқиш истагини билдирган тақдирда ариза топширади ва квота доирасида баллар кетма-кетлиги асосида имтиҳонсиз қабул қилинади. Қабул қилинадиган ўқувчилар сони 24 нафар этиб белгиланган.
Агарда белгиланган қабул квотасидан ортиқ талабгорлар битта ихтисослаштирилган мактабга ўқиш истагини билдирса, устунлик юқори балл тўплаган талабгорга берилади.
Аввалроқ Мактаб битирувчилари учун якуний назорат имтиҳонларининг санаси аниқ бўлганди.
