ЖССТ семизликни эпидемия деб эълон қилди

 

Кеча, 5 май куни Жаҳон соғлиқни сақлаш ташкилоти семизликни Европа минтақасида эпидемия деб эълон қилди. Бу ҳақда ССВ матбот хизмати хабар бермоқда.

 
Қайд этилишича, сўнгги 30 йил ичида дунёда семиз одамлар сони уч баравар ошган. 2030 йилга бориб ер юзи аҳолисининг қарийб 45 фоизи семириб кетиши мумкин. 

Ташкилот ҳисоботида келтирилишича, кўҳна қитъада яшовчи катта ёшли аҳолининг 60 фоизи ортиқча вазн ва семиришдан азият чекмоқда. 

Қолаверса, ҳар уч боладан бирига (ўғил болаларнинг 29 фоизи ва қизларнинг 27 фоизига) шу ташхис қўйилган. Энг ёмони, мазкур касаллик туфайли ҳар йили 1,2 миллион киши ҳаётдан кўз юммоқда.

Жаҳон соғлиқни сақлаш ташкилоти хулосасига кўра, ҳозирги динамикани ҳисобга олганда, Европадаги ҳеч бир давлат 2025 йилгача семиришга қарши курашда ижобий натижага эриша олмайди. 

Жисмоний фаолликнинг пасайиши, нотўғри овқатланиш, коронавирус чекловлари туфайли юзага келган салбий оқибатлар яқин йилларда одамлар саломатлигига зиён етказишда давом этади. 

Ана шуларни инобатга олиб, ЖССТ муаммони самарали ҳал этишга қартилган қатор тавсияларни тақдим этди.

 

Унга кўра, таркибида шакар бўлган ичимликлар учун солиқ жорий этилиши катта самара беради. Саломатлик учун фойдали бўлган озиқ-овқат маҳсулотлари нархини пасайтириш керак. Шунингдек, аҳолининг спорт мусобақалари ва соғлом турмуш тарзини таъминлашга қаратилган бошқа тадбирлардаги иштирокини кенгайтириш лозим.