Лицензиясиз Умра ташкил этиш: Андижон ва Фарғонада ноқонуний ҳолатлар фош этилди
Фуқаролардан жами 6 500 доллар талаб қилинган, ҳолатлар юзасидан тергов олиб борилмоқда.
Ўзбекистонда «Умра» зиёратини ташкил этиш учун махсус лицензия талаб этилади. Бироқ Андижон ва Фарғона вилоятларида фуқароларни зиёратга юборишни ваъда қилиб, улардан минглаб доллар талаб қилган шахслар аниқланди.
Давлат хавфсизлик хизмати ва ички ишлар органлари ҳамкорлигида ўтказилган тезкор тадбирлар давомида икки ҳолат қайд этилди.
Биринчи ҳолатда, Андижон шаҳридаги сайёҳлик фирмаси иш юритувчиси фирма тегишли лицензияга эга бўлмасада, Балиқчи туманида яшовчи, 1999 йилда туғилган фуқаронинг ишончига кирган. У фуқаронинг тўрт нафар қариндошини Саудия Арабистонига Умра зиёратига юбориш учун 4 400 АҚШ доллари талаб қилган. Иш юритувчи пулни олаётган вақтида ашёвий далиллар билан ушланган.
Иккинчи ҳолат Фарғона вилоятида қайд этилган. Тошлоқ туманида яшовчи, 2007 йилда туғилган шахс Фарғона шаҳрида истиқомат қилувчи икки фуқарони Наманган вилоятидаги сайёҳлик фирмаси орқали Умра зиёратига юборишни ваъда қилиб, 2 100 АҚШ доллари талаб қилган. У олдиндан 1 000 доллар олган вақтида қўлга олинган.
Ҳар икки ҳолат юзасидан жиноят ишлари қўзғатилган. Ҳозирда тергов ҳаракатлари олиб борилмоқда.
Эслатиб ўтамиз, Вазирлар Маҳкамасининг 2024 йил 12 октябрдаги 668-сон қарорига мувофиқ, «Умра» тадбирларини ташкил этиш ва ўтказиш фаолияти махсус лицензия асосида амалга оширилади.
