Қаршида 21 ёшли қиз операциядан кейин вафот этди: прокуратура текширув бошлади
Қизнинг аҳволи операциядан тўрт кун ўтиб оғирлашган.
Қарши шаҳрида яшаган 21 ёшли қиз жарроҳлик амалиётидан кейин вафот этди. Ҳолат юзасидан прокуратура органлари томонидан терговга қадар текширув олиб борилмоқда. Бу ҳақда Қашқадарё вилояти соғлиқни сақлаш бошқармаси маълум қилди.
Бошқарма маълумотига кўра, 2005 йилда туғилган Л.М. 14 октябрь куни “гипофиз аденомаси” ташхиси билан Қашқадарё вилоят кўп тармоқли шифохонасининг нейрохирургия бўлимига ётқизилган.
Беморни бир неча йил давомида нафас олиш қийинлашиши, бўй ўсишининг ортда қолиши, қўл ва оёқ бармоқларининг йўғонлашиши каби аломатлар безовта қилган. Текширувларда гипофиз безида катта ўлчамдаги ўсма аниқланган. Гормонал таҳлиллар эса ўсиш гормони миқдори меъёрдан сезиларли даражада юқори эканини кўрсатган.
16 октябрь куни пойтахтдан келган мутахассис иштирокида беморда бурун орқали эндоскопик усулда гипофиз бези ўсмасини олиб ташлаш операцияси ўтказилган.
Операциядан кейин бемор шифокорлар назоратида бўлган. 19 октябрь куни ўтказилган текширувда ҳеч қандай асорат аниқланмаган.
Бироқ 20 октябрь куни беморнинг аҳволи кескин оғирлашган. Унда қон босимининг кўтарилиши, ҳуш, нафас олиш ва юрак фаолиятининг бузилиши кузатилган. Интенсив даволаш муолажаларига қарамай, 26 октябрь куни бемор вафот этган.
Айни пайтда ҳолат юзасидан прокуратура органлари томонидан терговга қадар текширув олиб борилмоқда. Текширув натижалари бўйича қўшимча маълумот берилиши билдирилган.
