Марсело Мадрид клубини тарк этади
“Реал Мадрид” футболчининг кетишини эълон қилди
“Реал Мадрид” ўзининг расмий сайтида 15 йил давомида жамоада ўйнаган бразилиялик ҳимоячи Марселонинг кетиши ҳақида эълон қилди. Олдинроқ 34 ёшли футболчи “Ливерпул” билан 2021/2022 йилги Чемпионлар лигаси финали (1:0) унинг “Қироллик клуби”даги сўнгги ўйини эканлигини айтганди.
“Реал Мадрид” 13 июнь куни Марсело билан расмий хайрлашув маросими бўлиб ўтишини маълум қилди. Тадбирда клуб президенти Флорентино Перес ҳам иштирок этади. Шундан сўнг Марсело билан хайрлашув матбуот анжумани ташкил этилади.
Эслатиб ўтамиз, Марсело “Реал”да 2007-йилдан буён тўп суради. Бу вақт ичида у клуб учун барча мусобақаларда 545 та ўйин ўтказиб, 38 та гол урган ва 103 та голли узатмани амалга оширган. Клуб билан у олти марта Испания чемпионати, беш марта Испания Суперкубоги ва беш марта Европа чемпионлар лигасида ғолиб чиққан.
