ШҲТга янги аъзоларни қабул қилиш Самарқанд саммитининг асосий масалаларидан бири бўлади
Бу ҳақда ТИВ раҳбари маълум қилди.
Сентябрда Самарқандда бўлиб ўтадиган ШҲТ давлатлари саммитида ташкилотга аъзолик истагини билдирган қатор давлатлар мурожаатлари кўриб чиқилади. Бу ҳақда Ўзбекистон ташқи ишлар вазири в.б. Владимир Норов маълум қилди.
“ШҲТ фаолиятида тўлақонли аъзо, кузатувчи ва мулоқот бўйича ҳамкорлик юзасидан топширилган ўнлаб сўровлар кўриб чиқилади”, деган у “Дунё” ААга берган интервьюсида.
Дипломатнинг сўзларига кўра, ташкилотнинг истиқболда янада кенгайиши Самарқанд саммитининг асосий масалаларидан бири бўлади.
Норов ҳозирда Эроннинг ШҲТга тўлақонли аъзо бўлиб кириши юзасидан мажбуриятлар меморандуми тайёрлигини қайд этган. Шунингдек, бўлажак олий даражадаги йиғилишда Араб давлатлари лигаси, ЮНЕСКО, БМТнинг Осиё ва Тинч океани учун иқтисодий ва ижтимоий комиссияси билан ҳамкорлик меморандумлари имзоланади.
Аввалроқ ШҲТ ва Араб давлатлари лигаси ўртасида ҳамкорлик кучайтирилиши тўғрисида хабар берилганди.
