Сурхондарёда кадастр ходими жиноятга қўл урди
Унга нисбатан 2 та модда била иш қўзғатилган.
Фермер хўжалигига тегишли дала ер майдонини сохта ҳужжатлар орқали ўзлаштириш ҳолати аниқланди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Қайд этилишича, департаментнинг Узун туман бўлими томонидан фермер хўжалиги раҳбарининг мурожаатига асосан терговга қадар текширув ўтказилган. Унда Давлат кадастрлар палатаси Узун туман филиали мутахассиси А.Х. 3 нафар фуқарога сохта ҳужжатлар асосида “А.П.” фермер хўжалигига тегишли бўлган сувли ер майдони учун эгалик ҳуқуқини берадиган кадастр ҳужжатларини тайёрлаб берганлиги аниқланган.
Мазкур ҳолат юзасидан Жиноят кодексининг 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) ва 229-6-моддаси (суғориладиган ер участкасига ёки унинг бир қисмига бўлган ҳуқуқни сотиш ёхуд қонунга хилоф равишда бошқача тарзда ўзга шахсга бериш) билан жиноят иши қўзғатилиб, тергов ҳаракатлари ўтказилмоқда.
