"Ёнғин хавфсизлиги ойлиги": бу каби тадбирлардан натижа борми?

 

Қиш бошланди. Бу йил ҳар йилгидан кўра совуқроқ келди. Одамлар қишдан омон чиқиш илинжида бор имкониятлардан фойдаланмоқда. Давлат ҳам қараб тургани йўқ: халқнинг яхши яшаши учун бор куч-имкониятларни ишга солмоқда.

 

15 кунда 14 қурбон

 

Эндигина қишнинг икки ҳафтаси ўтди. Аммо ис газидан заҳарланган ва қурбонлар сони ортиб бормоқда. 15 кунда 14 қурбон — бу ижтимоий тармоқларда тарқалган хабарларнинг расмий тасдиғи.

 

12 декабрь Қўқонда газ портлаши оқибатида бир киши вафот этди.

 

11 декабрь Қашқадарёда 13 ёшли бола ис газидан заҳарланиб вафот этди. Унинг ёнида бўлган 9 ва 11 ёшли укалари шифохонага ётқизилган.

 

10 декабрь Қашқадарёда бир оиланинг уч аъзоси ис газидан вафот этди. Яна икки нафари касалхонага ётқизилган.

 

8 декабрь Хоразмда икки киши ис газидан вафот этди.

 

5 декабрь Бухорода Жондор туманида ис гази туфайли бир оиланинг 5 аъзоси вафот этди. Уларнинг энг кичиги 2020 йили туғилган. Шунингдек, худди шу куни Янгиҳаёт туманида икки қаватли коттежга ўт кетди. Икки киши қурбон бўлди. 

 

2 декабрь Самарқандда. Каттақўрғонлик ота ва унинг вояга етмаган қизи бир вақтда ўлган. Сабаб ис гази бўлиши мумкин, ҳали суриштирув давом этяпти.

 

24 ноябрь Фарғонада. Уч кунлик ёш келин-куёв ис газидан заҳарланиб, вафот этди.

 

21 ноябрь Қашқадарёда. 17 ёшли Қаршида яшаган абитуриент қиз ҳам ис газидан вафот этди.

 

15 ноябрь Жиззахда уч киши, шундан иккиси  вояга етмаган болалар.

 

13 ноябрь Хоразмда. Урганчда ижарада яшовчи шахс ва унинг боласи ис газидан ўлди.

 

7 ноябрь Жиззахда. Ис газидан вафот этганлар 3 нафар, шулардан иккиси 34 ёшли марҳуманинг 10 ва 5 ёшдаги ўғиллари бўлган.

 

2021 йилда 125 киши қурбон бўлди 

 

Республикамиз ҳудудида 2021 йилда ис гази билан боғлиқ жами 74 та ҳолат аниқланиб, ушбу ҳолатларда 67 нафар фуқаро заҳарланган ва 128 нафар фуқаро вафот этган бўлса, жорий йилнинг 9 февраль ҳолатига кўра, 21 ҳолатда 19 нафар фуқаро заҳарланган ва 36 нафар фуқаро вафот этган.  2020 йилда эса 106 киши қурбон бўлган.

 

"Ёнғин хавфсизлиги ойлиги" тадбирлари натижасида ёнғинлар сони камайган

 

Маълумки, ҳукумат комиссиясининг тегишли баёни билан 15 ноябрь – 15 декабрь кунлари республика ҳудудида "ЁНҒИН ХАВФСИЗЛИГИ ОЙЛИГИ" ўтказилди. Бу даврда уй-жой фонди, иқтисодиёт тармоқлари ва ижтимоий соҳа объектларида умумий ҳисобда 1 миллион 464 минг 237 нафар фуқаролар қамровида 56 минг 530 маротаба кенгайтирилган профилактик тарғибот тадбирлари ташкил этилди. 

 

Фавқулодда вазиятлар вазирлиги бошқарма бошлиғи ўринбосари Мавлонбек Досчановнинг маълум қилишича, ёнғин хавфсизлиги қоидаларини тарғиб қилувчи 709 минг 181 та нусхада эслатмалар тайёрланиб, бозорлар ва савдо комплексларида, жамоат транспортида, автостанция ва вокзалларда, одамлар оммавий йиғиладиган объектларда тарқатилди.

 

Туман (шаҳар) марказларидаги электрон таблоларда 649 минг 892 маротаба мавзуга оид видеороликлар намойиш этилди. Оммавий ахборот воситалари имкониятларидан кенг фойдаланган ҳолда телевидение орқали 3 минг 62 та кўрсатувлар, 1 минг 454 та телерепортаж ва 4 минг 802 та видеоматериаллар намойиш этилди.

 

Амалга оширилган ишлар натижасида ойлик даврида юз берган ёнғинлар сони ўтган йил билан таққосланганда 4,3 фоизга, инсонларни тан жароҳати олиш ҳолатлари эса 16,7 фоизга камайишига эришилган.

 

Республикамизнинг барча ҳудудларида ёнғинлар билан боғлиқ фавқулодда вазиятларнинг олдини олишга қаратилган кенг қамровли профилактик ишлар давом эттирилади.