"Биз 20 йилда ўқитувчиларга эътибор қаратмадик. Бундан ким ютқазди?"
Айни вақтда президент Шавкат Мирзиёев Халқаро конгресс марказида таълим соҳасидаги ислоҳотлар ҳақида мурожаат қилмоқда.
Таълим сифатида оширишга бағишланган учрашувда давлат раҳбари бугунги мавзу нақадар муҳимлигини яна бир бор таъкидлаб ўтди.
“Мана бугун таълим сифатини ошириш, янги дарсликлар масаласида гаплашамиз. Хўш, бу янги дарсликларни фарзандларимизга ким етказади? Албатта муаллим! Мен бекорга муаллимнинг обрўсини кўтариш ҳақида такрор-такрор гапирмайман. Бугунги глобаллашув даврида таълим, келажак авлод баркамоллиги қай даражада муҳимлигини янаям кучлироқ англаб етяпмиз.
Бугун ёшларимиз, болаларимизнинг ўзи “Бизга кечаги кун таълими керак эмас” деган талабни қўйишяпти. Ҳозирги ислоҳотларимизни реажалаштиряпмиз, катта-катта марраларни қўйяпмиз. Уларни айтиш осон, лекин бажариш азоб. Лекин ҳар қанча қийин бўлмасин биз фарзандларимиз учун бу ислоҳотларни амалга ошириш учун ҳаракат қилишимиз шарт", — деди Давлатимиз раҳбари.
Президент Янги Ўзбекистондаги ташаббусларни, айниқса, таълим бўйича ислоҳотларни чекка ҳудудларга ҳам кириб боришга ҳаракат қилинаётгани ҳақида гапирди.
“Биз аввало устознинг, муаллимнинг обрўсини кўтаришимиз керак. Айтиш керакки, биз 20 йилда ўқитувчиларга эътибор қаратмадик. Бундан ким ютқазди? Албатта, биз.
Навоийга борганимда ёшлар билан учрашув ўтказдим. Улардан «сизларни нима қийнаяпти?», деб сўрадим. Улар жавоб бера олмади. Саволга ўзим жавоб бердим: «корхоналардаги янги техника, асбоб-анжомларни ишлатишда қийинчиликлар бўляптими?», деган эдим, бир йигит бунга жавобан «билим етишмаяпти», деди. Бу ҳам ҳақиқат”, — деди президент.
Давлат раҳбари ҳар бир инсон ўзининг эртангги куни бўлган фарзандларни муаллимга ишониб топшириши ҳақида ҳам гапирди.
«Охирги йилларда таълимда ўқитувчининг кайфияти, дарс бериши ўзгаргани ҳам адолатли ҳақиқат. Мен ўзим ҳам таълим берганман, биламан бу соҳани. Олий Мажлисга йўлланган мурожаатномада айтилган олтита йўналишни бажариш азоб. Лекин бугун қийналмасак, эртага натижа бўлмайди», — дея қўшимча қилди Шавкат Мирзиёев.
