Буюк Британия Украинага Apache вертолётларини бериши мумкин
Ушбу вертолётнинг бир донаси 85 млн доллар туради.
Буюк Британия Украинага Hellfire ракеталари билан жиҳозланган Apache зарбдор вертолётларини юбормоқчи. Бу ҳақда The Mirror ўз манбаларига таяниб хабар берди.
Нашр суҳбатдошига кўра, Киев ушбу вертолётларни Challenger 2 танкларидан сўнг қабул қилади. Танк юборилиши ҳақида бундан аввал Буюк Британия Бош вазири Риши Сунак маълум қилганди.
“Apache ўйин қоидасини ўзгартиради. Танклар биринчи боради. Вертолётларни ишга тушириш учун маълум вақт талаб этилади. НАТОнинг бошқа аъзоларига ҳам бу намуна бўлди”, – деган манба.
Маълумотларга кўра, гап Apache AH64 E ҳақида кетмоқда, у ўз сериясидаги энг замонавий ветолёт саналади.
Ҳар бир Apache 16 тагача танкка қарши Hellfire ракетаси билан қуролланиши мумкин. 4 та шу каби вертолёт 70 та танкдан иборат бутун бошли полкни йўқ қилиш имкониятига эга. У Rolls Royce двигателлари билан жиҳозланган, тезлиги соатига 300 километрга етиши мумкин. Бир дона Apache 70 миллион фунт-стерлинг (85,6 млн доллар) туради.
Қайд этилишича, украиналик учувчилар вертолётни бошқаришни Буюк Британияда ўрганади. Унга хизмат кўрсатиш эса Украина билан чегарадош давлатларда амалга оширилади.
