Бразилия ва Аргентина ягона валюта яратиши мумкин
Агар бу лойиҳа амалга ошса ва Жанубий Американинг бошқа давлатлари қўшилса, валюта иттифоқи жаҳон ЯИМнинг 5 фоизини қамраб олади.
Бразилия ва Аргентина ҳукуматлари ягона валюта яратиш устида ишламоқда. Бу ҳақда икки давлат президентлари Луис Инасиу Лула да Силва ва Альберто Фернандеснинг қўшма мақоласида сўз боради.
“Биз Жанубий Америка учун умумий валюта яратиш ғояси муҳокамасини давом эттирамиз. Бундан нафақат молиявий, балки савдо операцияларини амалга оширишда фойдаланиш мумкин. Бу харажатларни қисқартириш ва ташқи қарамликни камайтиришга ёрдам беради”, – дейилади мақолада.
Жанубий Американинг икки энг йирик иқтисодиётининг юқоридаги режалари ҳақида дастлаб The Financial Times хабар берганди. Ягона валюта лойиҳаси Буэнос-Айресдаги саммитда муҳокама қилинади, унга бошқа давлатлар ҳам жалб қилиниши мумкин.
“Мен ёлғон умидларни яратишни истамайман. Бу Лотин Америкаси ўтиши лозим бўлган узоқ йўлдаги илк қадам бўлади”, – деган Аргентина иқтисодиёт вазири Серхио Масса.
Вазирнинг фикрича, лойиҳанинг амалга оширилиши учун узоқ йиллар керак. У Европа ягона валюта яратиши учун 35 йил вақт кетганини эслатган. Бразилия томони янги валютани “сур” деб номлашни таклиф қилган (“сур” испанчадан жануб дегани).
Режаларга кўра, янги пул бирлиги Бразилия реали ва Аргентина песоси билан параллель муомалада юради. Агар унга Лотин Америкасининг бошқа давлатлари ҳам қўшилса, валюта иттифоқи жаҳоннинг 5 фоиз ЯИМни қамраб олади.
