WSJ:  Хитой Россияга сотиш тақиқланган технологияларни етказиб бермоқда

 

Хитой халқаро санкция ва чекловлар фонида Россияга урушни давом эттириш учун зарур технологияларни етказиб бермоқда. Бу ҳақда РФ божхона хизмати маълумотларига асосланиб, The Wall Street Journal (WSJ) хабар берди.

 

Божхона ҳужжатлари C4ADS нашрига берилган. Бу ташкилот АҚШ миллий хавфсизлигига таҳдидларни аниқлашга ихтисослашган. Журналистлар 84 минг етказиб беришни ўрганиб чиқди. Уларнинг барчаси Ғарбнинг РФга қарши иқтисодий босими бошлангандан сўнг амалга оширилган.

 

Маълумотларга кўра, Хитойнинг давлат мудофаа корхоналари Москвага навигация қурилмалари, радиосигналларни йўқ қилиш технологиялари ва қирувчи самолётлар учун деталлар сотган. Маҳсулотларни Ғарб санкциялари остидаги Россия мудофаа саноати компаниялари қабул қилган.

 

Гап икки мақсадли  товарлар ҳақида кетмоқда. Хусусан, Хитойнинг Poly Technologies компанияси “Рособоронэкспорт” корпорациясига Ми-17 ҳарбий-транспорт вертолётлари учун навигация қурилмаларини етказиб берган.

 

АҚШ давлат котиби Энтони Блинкен 5-6 февраль кунлари Пекин билан ушбу масалада гаплашиши керак эди. Аммо Америка осмонида Хитойга тегишли ҳаво шари аниқлангач, ушбу ташриф номаълум муддатга қолдирилди. Вашингтон аэростат разведка мақсадларида ишлатилганини айтмоқда.

 

Туркия ва БАА ҳам Россияга технологиялар етказиб бермоқда

 

Россия аксарият ҳарбий эҳтиёжларини ўзи қондира олади. Аммо икки мақсадли технологиялар импортига қарамлиги бор. Бу айниқса, яримўтказгичларда сезилади.

 

Божхона ҳужжатларида АҚШ босими остидаги 10 га яқин Хитой ва РФ компаниялари аниқланди. Шунингдек, Туркия ва БАА орқали ҳам кўплаб санкциялар остидаги товарлар кириб келмоқда. Ўз навбатида Хитойнинг Вашингтондаги элчихонаси матбуот котиби Лю Пенъюй WSJ хабарини инкор қилди ва у ҳеч қандай фактга асосланмаганини таъкидлади.

 

Россия вакиллари эса ҳозирча бунга изоҳ бермаган.